Episode 2: "Cheetah Gati – Ek Yodha Ki Raftar"

 Pehle kadam ke baad, Arin badal chuka tha. Uski aankhen ab har choti si halchal ko dekh sakti thi, uske kaan door ke patton ki aahat ko sun sakte the. Uska sharir jaag gaya tha. Par ek yodha ke liye sirf jagrukta kaafi nahi hoti. Ek yodha ko bijli se tez bhi banna hota hai. Ab Arin ke samne tha doosra rank — Gati. Guru ne kaha: “Ab tumhe apne sharir ki seemaon ko todna hoga. Cheetah ki tarah daudna seekhna hoga. Lekin bina thakawat ke, bina chot ke. Tumhara har kadam gyaan ke saath hona chahiye, gussa ke saath nahi.”

Agle din Arin ko ek nadi ke paas le jaya gaya. Nadi ke us paar ek patthar tha — door, lekin dikhta tha. Guru ne kaha:

“Us patthar tak daud kar jao. Par yaad rahe, saans phoolni nahi chahiye. Tumhare kadam mitti ko todte nahi, mitti ko mehsoos karte hue chalne chahiye.”

Arin daudta hai. Pehla kadam bhaari. Doosra kadam tez, teesra kadam be-dhyaan. Aur 30 kadam ke baad, wo ruk jaata hai. Saans tez, pair dard se bhar gaya. Guru kehte hain:

“Tum daud rahe ho jeetne ke liye, mehsoos karne ke liye nahi. Ek yodha daudta hai samajhne ke liye, apne sharir ki gati ka raaz jaane ke liye.”

Usi din se Arin ki naye tareeke se training shuru hoti hai. Har subah woh ped ke neeche baithta hai, aankhen band karke apne pairon ke angon ko mehsoos karta hai. Pehle panje, fir ghoontna, fir kamar. Wo sochta hai: “Mera pair mujhe kaise le jaata hai? Jab main daudta hoon, to pair pehle kis hissa ko zameen par rakhta hoon? Angutha, panja, ya aadi pair?”

Ek din guru aate hain, aur ek prashn puchte hain:

“Tumhare pair zameen se takraate hain, ya zameen ko chhoote hain?”

Arin samajh nahi paata. Guru kehte hain:

“Cheetah zameen se ladta nahi, wo usse dosti karta hai. Jab tak tum mitti ko dushman samjhoge, gati tumse door rahegi.”

Guru Arin ko ek naya abhyaas dete hain: Nange pair daudna. Jungle ke ek khule maidan me, bina jooton ke, nange pair. Har din sirf 100 kadam, lekin har kadam dhyan ke saath. Arin pehle darta hai — kaante, pathar, garam mitti — lekin dheere dheere uska sharir in sab se samvad karna seekh leta hai. Mitti ki thandak, pathar ka kinara, ghaas ki naramiyat — sab kuch ab uske pair mehsoos karte hain.

Ek raat Arin sochta hai: “Pehle main daudta tha sirf pahunchnay ke liye. Ab main daudta hoon jeene ke liye. Har kadam ek kahani hai.”

Das din baad, Guru fir nadi ke paas le jaate hain. Wahi patthar, wahi daud. Arin aankhen band karta hai, apni saans ko niyantrit karta hai, aur daudna shuru karta hai. Har kadam ek laya mein. Saans ek geet jaisi. Pair zameen par chhup chhup kar girte hain. Aur sirf 20 seconds me Arin patthar tak pahuchta hai — bina thake, bina haanphe.

Guru haste hain:

“Yeh hai gati. Jab tum gati ko control kar sakte ho, tabhi tum uska sahi upyog seekhte ho. Ab tum dusre rank ke yogy ho.”

Arin ab samajh chuka tha — gati kisi competition ka hissa nahi hai. Gati ek bhavna hai. Jab man, sharir aur saans ek ho jaate hain, to gati prakat hoti hai. Tab daudne ke liye zameen bhi tumhare sath hoti hai, aur hawa bhi.

Guru ek gopniya baat batate hain:

“Ek samay tha jab yodhao ko daudte waqt zameen ki tarah hawa bhi sahyogi lagti thi. Unki gati itni tej hoti thi ki ve paani par daud jaate the. Tum bhi us disha me ho.”

Ab Arin har subah jungle me daudta hai, par sirf daudne ke liye nahi — swayam ko pehchaanne ke liye. Har ped, har pathar uska guru ban gaya hai. Uska sharir ab bina kahe samajh jaata hai — kab rukna hai, kab daudna hai, kab hawa se takraana hai.

Ek din guru puchte hain:

“Kya tum ab tayar ho teesre rank ke liye?”

Arin aankhon me tej lekar kehta hai:

“Main tayar hoon.”

Agle padav ka naam hai — Shakti Ka Kavach. Kaise ek yodha apne sharir ke charon taraf ek aisa kavach banata hai jo usse shastron, goli, aag — sabse bachata hai. Kya ye kavach sach hai? Kya manushya bina kisi lohe ke apne charon taraf ek urja ka ghera bana sakta hai?

Ye sab aur zyada, agle episode me.

Tab tak... apne pair se puchho, kya wo tumhare sath hain?