Episode 3: “Shakti Ka Kavach – Manushya ya Yantra?”

 Guru ne Arin se pucha:

"Yodha ke paas talwar ho ya na ho, lekin kya tum soch sakte ho ki bina kisi hathiyar ke bhi woh ajey ho sakta hai?"

Arin hairaan tha. "Bina hathiyar ke kaise?"

Guru muskaraaye. "Jab tumhare paas ho Shakti Ka Kavach."

Guru ne Arin ko ek jungle ke sabse gahre bhaag me le jaaya. Wahan tha ek purana mandal – patharon se bana hua, jisme prachin yodhao ne tapasya karke apna urja kavach banaya tha. Mandal ke beech me baithkar, Arin ne prashn kiya:

"Yeh kavach dikhai to nahi deta. To phir yeh hota kaise hai?"

Guru ne kaha:

"Kavach dikhai nahi deta, par mehsoos hota hai. Jaise hawa, jaise dhvani, jaise vishwas. Jab tumhara man, saans aur urja ek disha me ho jaayein, tab tumhare aaspaas ek ghera ban jaata hai. Yehi hai kavach."

Training ka pehla din – Guru ne kaha:

"Sirf baitho. Ankhein band karo. Socho mat, mehsoos karo. Apne sharir ke 1 inch door par dhyan do. Kya wahan kuch hai?"

Arin ne apni saans par dhyan diya. Dheere-dheere usne mehsoos kiya ki uska sharir hawa se ghira hua hai, lekin wo sirf hawa nahi thi. Jaise kuch ghanatva tha. Guru kehte hain:

"Yeh tumhari urja hai. Har jeev ke paas hoti hai. Tumhara kaam hai use jagana."

Doosra din – Guru ne ek chhoti si agni Arin ke saamne jalaayi.

"Aankhen band karo, aur mehsoos karo ki yeh agni tumhare andar jal rahi hai. Uska prakash tumhare sharir ke bahar tak ja raha hai."

Arin ne mehsoos kiya — jaise ek garm roshni uske chhati se nikal kar uske charon taraf ghoom rahi ho. Guru ne kaha:

"Is roshni ko ghoomne do. Use ek gola banaane do. Din ba din, yeh roshni tumhara kavach banegi."

Teesre din, Guru ne ek naya abhyaas shuru karwaya:

"Nadi ke beech me baith jao. Paani ke beech, aankhen band, saans dheer, aur roshni ka gola tumhare aaspaas."

Arin ne mehsoos kiya ki paani usse chho raha hai, lekin ek had tak. Uske sharir se ek inch door rehkar har lehar wapas ho jaati. Guru ne kaha:

"Kavach ban raha hai. Yeh tumhara raksha chakra hai. Jab yeh majboot ho jaayega, to na talwar tumhe chho sakti hai, na aag jalaa sakti hai."

Ek raat Arin ne sapna dekha. Usne dekha ek purana yodha, jiske haathon me kuch nahi tha, lekin samne khada rakshas us par vaar nahi kar paaya. Har vaar uske aaspaas se takraake wapas jaa raha tha. Jab Arin ne us yodha se pucha – "Ye kya hai?" Usne kaha – "Ye vishwas hai."

Agli subah, Arin ne guru se kaha – "Main tayar hoon."

Guru ne ek test diya. Jungle ke ek bhaag me, kuch chhote patthar tej gati se Arin ki taraf phenke gaye. Arin aankhen band kar khada raha, apne kavach par dhyan lagaye. Haar baar paththar uske sharir se pehle ruk gaya, ya uska disha badal gaya.

Guru bol pade:

"Ab tum samajh gaye ho. Kavach koi jadui takat nahi, tumhari jagrookta ka parinaam hai. Tumhara man, jab apni poori urja se jagta hai, to tumhare charon taraf ek shakti ka ghera ban jaata hai."

Arin ne pucha – "Kya sabhi ke paas ye shakti hoti hai?"

Guru bole – "Haan, lekin sab ise jagate nahi. Kuch log is urja ko gusse me kho dete hain, kuch log dar ke neeche daba dete hain. Sirf wahi yodha ise jagata hai jo khud ko samajhta hai."

Guru ne antim baat kahi:

“Yeh kavach tumhe andar se surakshit karta hai. Lekin yaad rahe, agar tumhara man chanchal ho jaaye, dar aa jaaye, ya ahankar aa jaaye — to kavach toot jaata hai.”

Arin ne apne haath jode, aankhen band ki, aur mehsoos kiya – uske aaspaas ek prakash ka gola tha, garm, halka, lekin dridha. Usne apne aap se kaha – “Main ek yodha hoon, aur meri urja meri shakti hai.”

Guru ne muskarate hue kaha –

"Ab tum teesre rank ko paar kar chuke ho. Agla padav hai – Udaan."

Kaise ek manushya apne sharir ko itna vash me kar sakta hai ki wo hawa me udne lage? Kya yah sach hai, ya sirf ek kahani?

Agle episode me – "Vayugati – Jab Zameen Ne Inkaar Kiya."