Episode 4: “Aakaash Gaman – Yodha Ki Pehli Udaan”

 Teen rank paar karne ke baad Arin ab chauthe padav par tha — ek aise rahasya ke samne jo insaan ko zameen se uthane ka gyaan deta tha. Guru ne is rank ka naam diya tha — Aakaash Gaman.

Guru bole, "Yeh padav sirf hawa mein udne ka abhyas nahi hai. Yeh tumhare man, sharir, aur urja ke madhur talmel ka praman hoga. Yodha zameen se nahi, apne bhoj se mukt hone se udta hai."

Arin ne socha — kya insaan hawa mein ud sakta hai? Kya prachin yodha sach mein aisa karte the? Guru ne jawab diya, "Insaan jab apne bhay, apni icchayein, aur apne sharirik bhoj se mukt ho jaata hai, tab uska man uran bhar sakta hai. Pehle man udta hai, fir sharir uska anukaran karta hai."

Arin ki training shuru hui — ek unche pahad ki choti par. Waha har subah ek ek step chadkar use sabse unchi jagah tak pahuchna hota. Lekin Guru ne kaha, "Choti par pahuchna uddan nahi. Udaan hai wahan khade hokar hawa ke saath ek ho jana."

Pehle din Arin ne hawa ko mehsoos kiya. Usne dekha — patte kaise udte hain, pakshi kaise seedha nahi, lekin golai me udte hain. Guru ne bataya, "Tumhara sharir tab tak uddan nahi bhar sakta jab tak tum usse control karne ka vishwas nahi karte."

Training ka doosra hissa tha — man se sharir ke wajan ko kam mehsoos karna. Har din Arin ko ek patthar uthakar chalna hota, lekin dhyan me sochna hota ki uska wajan zero hai. 7 din tak kuch nahi badla. Lekin 8ve din usse laga jaise patthar halka ho gaya ho.

Guru ne haste hue kaha, “Tumhara man ab tumhare sharir ko vishwas dene laga hai. Tum uran ke pehle kadam par ho.”

Phir aayi mukhya training — hawa ke against khade hokar apne sharir ko sthir rakhna. Ek din Arin 3 ghante tak hawa ke samne khada raha. Na jhuka, na hila. Sirf saans aur dhyan. Uske sharir ke charon taraf garmi si fail gayi. Uska man itna sthir ho gaya ki use laga — jaise wo zameen se thoda upar uth gaya ho.

Guru ne usse kaha, “Aankhen band karo. Apne pairon ko zameen se chutne do, bina dar ke.”

Arin ne socha — “Yeh sambhav nahi.” Lekin phir usne guru ki awaaz yaad ki, "Dar ne kabhi kisi yodha ko udne nahi diya."

Aankhen band kar Arin ne apne sharir ke bhoj ko chhoda. Saans andar kheenchkar, apne kavach ko active kiya. Usse laga jaise ek halki si dhadkan pairon ke neeche ho rahi ho. Aur ek pal ke liye — sirf ek pal — use laga jaise uske pair zameen ko nahi chhoo rahe.

Wo pal chhota tha, lekin mahatvapurna. Guru ne aankhon me chamak ke sath dekha, “Tumne apna pehla kadam udaan ki taraf rakha hai. Ab har din tumhara sharir thoda aur halka hoga.”

Agle kuch dino me Arin ne seekha ki uran sharir se nahi, kavach aur man ki urja se hoti hai. Usne visualisation ka abhyas kiya — sochta ki wo ek pakshi hai, ya ek hawa ka ghera hai. Har din ek step zyada.

Phir aayi antim training — pahadi ke kinaare par khade hokar kavach activate karna aur hawa ke bharose khud ko chhod dena.

Guru ne kaha, “Tum giroge nahi. Agar tumhara man vishwas kare, to kavach tumhe sambhalega.”

Arin ne aankhen band ki. Uske pair kinare par. Usne guru ki sikh yaad ki — "Hawa sirf chalti nahi, wo sambhalti bhi hai. Bas tumhara vishwas chahiye."

Ek gehri saans... aur Arin ne apne pair zameen se utha diye. Ek pal ke liye sab kuch shaant ho gaya. Usne na girne ka dar mehsoos kiya, na hawa ka dhakka. Sirf ek halka pan. Jaise koi usse hawa mein le ja raha ho. 5 second, 10 second... aur jab usne aankhen kholi, to wo kuch inch zameen se upar tha. Kavach ka ghera chamak raha tha.

Neeche utarne ke baad guru ne bas itna kaha, “Tumne aakaash gaman ka prarambh kar diya hai. Ab tum us shreni me ho jahan sirf manushya nahi — divya yodha jaate hain.”

Arin ne poocha, “Guruji, kya main kabhi sahi arth me ud paaunga?”

Guru bole, “Jab tum kisi bhi bhoj ke bina jeena seekh jao, jab tumhara man aur sharir sirf urja me badal jaye — tab tum asman chhoo loge.”

Agle padav ke liye guru ne bataya, “Ab tumhe sikhna hoga Shabd-Shakti. Ek aisi kala jahan sirf tumhari awaaz kisi vastu ya jeev ko rok bhi sakti hai aur chala bhi sakti hai.”

Arin ab tayar tha — agle rank ke liye jahan shabdon ke zariye urja ko niyantrit karna hoga.